◎陈嫚 职员
琴日睇咗篇文章，通过各区GDP总值和人均GDP总值排名来分析广州咁多个区，边个区最富，边个区最穷。根据GDP总值排名，冠军系天河区，其次系黄埔、越秀、番禺、白云、海珠、南沙、花都、荔湾、增城、从化。即系话，天河最富，从化最穷，你同唔同意呢？
讲起天河，呢度系广州嘅新城市中心，CDB喺度，天河商圈系度，大把金融、IT公司都系度，面积就够大，所以GDP总值排第一，一啲都唔令人意外。而黄埔区由原来个黄埔、萝岗合二为一，有经济开发区，所以可以排名第二。而越秀、荔湾、白云呢啲老城区，因为面积小，发展有限，所以只能尾随天河、黄埔呢啲新兴区域。从化、增城以前都属于县级市，两年前先至撤市设区，喺大家眼中，呢两个地方都好似乡下，只能去摘下荔枝、浸下温泉，排名垫底一啲都唔出乎意料。
讲开又讲，大家应该仲想八卦下边个区嘅有钱佬最多。据我所知，有钱人比例最高嘅，一个系越秀区嘅二沙岛，另一个系天河区嘅汇景新城。其实咧，价格高嘅楼盘就系有钱人集中地喇，因为有钱人先至买得起阿嘛，比如珠江两岸、珠江新城、天河北嘅高层住宅，仲有白云、花都嘅一啲超豪别墅，住嘅绝对系有钱人。